जियरा जुड़इहैं रे सजनी (एक प्रिय-विमुक्ता का उच्छ्वास)

पीसत जतवा जिनिगिया सिरइलीं
दियवा कै दीयै भर रहलैं रे सजनी।
मिरिगा जतन बिन बगिया उजरलैं
कागा बसमती ले परइलैं रे सजनी॥

सेमर चुँगनवाँ सुगन अझुरइलैं
रुइया अकासे उधिरइलीं रे सजनी।
साजत सेजियै भइल भिनुसहरा
निनियाँ सपन होइ गइलीं रे सजनी॥

अँगना-ओसरिया में डुहुरैं दुलुरुवा
अन बिन मुँह कुम्हिलइलैं रे सजनी।
सुधियो ना लिहलैं सजन निरमोहिया
अखियौ कै लोरवा सुखइलैं रे सजनी॥

बिरथा तूँ बिलखैलू धनि बउरहिया
पिया अँखपुतरी बनइहैं रे सजनी।
उनहीं की सुधिया में रहु धिया लटपट
पंकिल जियरा जुड़इहैं रे सजनी॥