जय भारत बोला ….

घन अमरईया में विरमि चिरइया सुगना-मयन भरि प्रीत रे !
पुलकि अरुन जुग चोंचिया पसरलैं गावत मनहर गीत रे ॥
राजिव न्यना कवन बने भ्रमलैं भिलनी केवटवा कै मीत रे ।
कहाँ मधुबनवाँ में नचलैं मोहनवा धरती देखाव पुनीत रे ॥
* * *

पँखिया पसार हो विहँग आवा उड़ि चलीं ॥
इहै बरसनवा की साँकरि खोरी
माधव राधा की मनहर जोरी ।
बरसै बँसुरिया की अमिरित धार हो, विहँग आवा उड़ि चलीं ॥

तृण-दल चरलीं इहैं धावरि गइया
इहवैं क माटी खइलैं कुँवर कन्हइया ।
काली मथन इवहैं अपरमपार हो, विहँग आवा उड़ि चलीं ॥

इहवैं ठुमुकि नचलैं यशुदा कै लाला
रास रचवलैं इहवैं काली कमली वाला ।
इहवैं कदम छहियाँ बिरिज बहार हो, विहँग आवा उड़ि चलीं ॥ 
* * *

चिरई धरतिया ई जग कै परान रे ॥

एहि ठहियाँ बनरा हिलवलैं सुमेरू
तिरिया गोहरिया पै जुझलैं पखेरू ।
सगरा पै पथरा कै अबहीं निसान रे —
चिरई धरतिया ई जग कै परान रे ॥

इहवैं केवटवा कै सुर-सरि उतरू
जूठन खइलैं भिलनियाँ कऽ दुलरू ।
सिंह हिरन सँगवा करैं जलपान रे…
चिरई धरतिया ई जग कै परान रे ॥

बन-बन डुहरलैं नयनवा की पुतरी
धुरिया परसि शिला भइ तिया सुन री ।
इहवैं कुँवर कईलैं धनुष सँधान रे…
चिरई धरतिया ई जग कै परान रे ॥
* * *