Rangoli

हुलसै ला पगवा पखार हो लहरिया क हार ले ले सगरा॥
हिमकर हास दसन द्युति उडुगन,
मलयज बाजै सितार हो लहरिया क हार ले ले सगरा ।
सुर मणि मौलि मुकुट धवलागिरि
किंकिणि गंगा विहार हो लहरिया क हार ले ले सगरा ।
नरमद सिन्धु ललित अलकावलि
बिन्दी तिलक घनसार हो लहरिया क हार ले ले सगरा ।
द्राविण बंग तमिल अरु उत्कल
केरल चिरिया कै तार हो लहरिया क हार ले ले सगरा ।
* * *

सखि अग जग मन चोरवा हो मोर भारत देशवा ।
गौतम गाँधी कै सजल सपनवाँ
राना, सिवा, लछिमीबाई क प्रनवाँ,
नख शिख सुभग पोर-पोरवा हो मोर भारत देशवा ।
भगत, अजाद, तिलक, चितरंजन
इनिरा, जवाहिर कै नयना क अंजन,
नाचै निरखि मन मोरवा हो, मोर भारत देशवा ।
* * *

बाबूजी कऽ एगो कविता प्रस्तुत बा। ई हऽ दुसरी कड़ी। पहिली इहाँ पढ़ीं जा। जइसे-तइसे भोजपुरी लिख के गावै-बजावै वालन से अलग भोजपुरी, साहित्यिक संसकार में पगल भोजपुरी लिखे के हिमायती हउअँ हमार बाबूजी। आपन स्कूल खातिर बहुत लिखलन, ओही डायरी में लिखल कवितन में से इहाँ प्रस्तुत करत हईं। हमके तऽ एतने भोजपुरी लिखे में बहुते प्रयास करे के पड़ल हऽ, पूरा औघड़ हईं हम तऽ –

इन्नरपुर मदमथनी हमरी केसर कुंकुम नगरी
मोर कसमिरवा जागी ना ।
जननी माथै कै सिन्दुरवा, मोर कसमिरवा जागी ना ॥

कस्तूरी हिरनवाँ फनिहैं अम्बर ब्योम वितनवाँ
मोर कसमिरवा जागी ना ।
कवि गुरु कालीदास परनवाँ मोर कसमिरवा जागी ना ॥

जागी राजस्थनवाँ जागी कैकय सिन्धु सिवनवाँ
मोर कसमिरवा जागी ना ।
जागी सउँसै हिन्दुस्तनवाँ मोर कसमिरवा जागी ना ॥
* * *

जय भारत बोला सुगन मयना ।
जय भारत बोला सुगन मयना ॥

इहवाँ बदे तरसै इन्नर की नगरी
सपनों में तजबै न इहवाँ की डगरी ,
अब ’पंकिल’ खोला अलस नयना –
जय भारत बोला सुगन मयना॥

Categorized in:

भोजपुरी, लोकगीत,

Last Update: April 11, 2024

Tagged in:

, ,